Nýverið opnaði Starfsmenntasjóður verslunar- og skrifstofufólks nýjan vef www.starfsmennt.is. Vefurinn er upplýsingavefur um með hvaða hætti sjóðurinn styður við menntun félagsmanna og veitir einnig aðgengi að umsóknareyðublöðum.

Sérstök áhersla var lögð á aðgengi sjónskertra og litblindra, en uppsetning þeirrar virkni var unnin af forriturum Outcome hugbúnaðar í samstarfi við fyrirtækið SJÁ sem var ráðgefandi um aðgengismálin.

Þegar Ingibjörg Guðmundsdóttir formaður Landssambands íslenskra verslunarmanna kynnti vefinn fjallaði hún sérstaklega um mikilvægi þess að hugað væri að aðgengismálum og vildi að þessi vefuppsetning yrði öðrum og sérstaklega þeim sem að menntamálum koma hvatning til að koma þessum aðgengismálum í gott horf.

Á þessum vef er  boðið upp á sérhannaðar stillingar fyrir lesblinda notendur og höfum við ákveðið að kalla stillingarnar Textaham. Má nefna að hægt er að stilla:

• Bakgrunnsliti
• Leturstærð
• Liti á letri
• Stafabil
• Orðabil
• Línubil
• Leturgerð
• Einnig er hægt að merkja sérhljóða sérstaklega

Smellið á gleraugun í hægra horninu á starfsmennt.is til að komast í textahaminn og notið fellivalsgluggana (glugga þar sem hægt er að velja möguleika úr lista) efst á síðunni til að breyta stillingum. 

Til að fá vefinn aftur í eðlilegt horf (eins og hann var í upphafi) skal smella á hnappinn upprunalegt útlit.

Vefurinn er byggður á Outcome vefstjóranum. Fyrirtækið SJÁ ehf. var leiðbeinandi í uppbyggingu textahamsins og útlitið var hannað af auglýsingastofunni Fabrikkunni.