Fyrir skömmu var undirritaður samningur Kópavogsbæjar við Outcome hugbúnað ehf. sem hefur þróað og markaðssett Outcome vefkannanakerfi. Með samningnum fær Kópavogsbær aðgang að Outcome kannanakerfinu sem gerir bænum kleift að framkvæma viðhorfs- og þjónustukannanir í gegnum tölvupóst og internetið.

Kópavogsbær mun í framtíðinni framkvæma rafrænar kannanir með kannanakerfi Outcome til að afla upplýsinga um viðhorf íbúa með það að markmiði að bæta þjónustu við bæjarbúa. Kerfið mun einnig verða notað við framkvæmd kannana sem lúta að innra starfi bæjarins, t.d. skólamatskannana í 26 skólum Kópavogs og ýmissa kannana sem varða starf leikskóla.

Sigurður Björnsson, markaðsstjóri Kópavogsbæjar segir kerfið gera bæjaryfirvöldum kleift að framkvæma margar þjónustukannanir á einfaldan hátt með litlum tilkostnaði. Niðurstöður liggi strax fyrir í rafrænni skýrslu. Rafrænar kannanir bæti lýðræðisleg vinnubrögð og séu til mikilla þæginda vegna þess að allir geta svarað á einfaldan hátt.