Reykjavíkurborg og Outcome hugbúnaður hafa í dag endurnýjað samning um notkun borgarinnar og stofnanna hennar á Outcome kannanakerfinu. Kerfið hefur verið í notkun hjá borginni allt frá árinu 2002 og byggt á fenginni reynslu hefur samningurinn verið endurnýjaður.

Samningurinn var undirritaður af Álfheiði Eymarsdóttur, þjónustustjóra Reykjavíkurborgar, og Art Schalk fyrir hönd Outcome hugbúnaðar.

Frá því að Outcome kannanakerfið var tekið í notkun hjá Reykjavíkurborg hefur fjöldi notenda aukist jafnt og þétt og kannanakerfið er nýtt reglulega til framkvæmdar minni og stærri kannana hjá einstaka deildum og sviðum. Kerfið er einnig lykilþáttur í  umfangsmiklum starfsánægjukönnunum sem reglulega eru framkvæmdar hjá Reykjavíkurborg og nýtist í samhæfðu árangursmati (BSC) sem Reykjavíkurborg hefur unnið með síðustu ár. 

Að mati Álfheiðar skapar kerfið borginni hagkvæmt og gott verkfæri til skipulegri og betri mælinga á frammistöðu sinni gagnvart íbúum, fyrirtækjum og starfsfólki. Borgin og starfsfólk hennar leggur mikið upp úr því að sinna sínum verkum vel og standa sig. Lykillinn að því er að þekkja stöðuna á hverjum tíma og geta þar með brugðist við og mótað hvert skuli stefnt.

Frá því að kannanakerfið var tekið í notkun hafa verið gerðar ýmsar tilraunir með nýtingu þessarar tækni og frá því í sumar hefur borgin gert þjónustukannanir í sundlaugum borgarinnar. Sérstakur Outcome tölvustandur hefur verið nýttur í þessum tilgangi og hefur hann skilað töluverðum upplýsingum um ánægju og þarfir sundlaugagesta. Standurinn kemur í stað tímabundinna starfsmanna sem áður sinntu þessari söfnun upplýsinga og öll úrvinnsla gagna er mun einfaldari en áður.  

Notkun Outcome kannanakerfisins skapar möguleika á virkara þjónustumati hjá stofnunum og fyrirtækjum borgarinnar ásamt því að draga verulega úr kostnaði við upplýsingaöflunina.

Art Schalk og Andrea Ósk Jónsdóttir, verkefnisstjóri
Þjónustu- og rekstrarsviðs ánægð með undirskriftina.