Fjögur aðildarfélög hjá Bandalagi Háskólamanna (BHM) greiddu rafrænt atkvæði um nýgerðan kjarasamning við Reykjavíkurborg og launanefnd sveitarfélaga um miðjan desember. Þar fylgdu þau fordæmi fimm annarra aðildarfélaga sem greiddu atkvæði með þessum hætti í fyrri hluta desembermánaðar.

Eftirfarandi félög greiddu nú atkvæði:

• Félagsráðgjafafélag Íslands - um samninga við Reykjavíkurborg og launanefnd sveitarfélaga
• Iðjuþjálfafélag Íslands - um samning við launanefnd sveitarfélaga
• Sálfræðingafélag Íslands - um samninga við Reykjavíkurborg og launanefnd sveitarfélaga
• Þroskaþjálfafélag Íslands - um samning við Reykjavíkurborg

Um var að ræða atkvæðagreiðslu senda með tölvupósti en alls voru um 550 aðilar á kjörskrá. Þátttakan var mjög góð eða allt upp í 78% í einstaka félagi og að meðaltali yfir 60%. Niðurstöður voru afgerandi og var kjarasamningurinn samþykktur með afgerandi hætti í öllum félögunum.