Í fyrrihluta maímánaðar opnaði Eures, evrópsk vinnumiðlun nýjan vef sem byggður er á Outcome vefstjóranum. Vefurinn inniheldur mikið af upplýsingum sem gagnast þeim sem hug hafa á að leita sér að vinnu á evrópska efnahagssvæðinu eða vilja fá starfsfólk erlendis frá. Um er að ræða fjölþættar upplýsingar um það hvernig fólk skuli bera sig að við atvinnuleit og að hverju þurfi að huga þegar leitað er út fyrir landssteinana eftir starfi.

Einnig má finna á vefnum upplýsingar fyrir atvinnurekendur sem vilja fá til sín starfsfólk frá Evrópu, en ein af meginreglum EES er frjálst flæði starfsfólks á milli þeirra ríkja sem aðild eiga að samningnum.   Sömuleiðis má finna upplýsingar fyrir fólk af erlendu bergi brotnu, sem áhuga hafa á að starfa á Íslandi.

Loks er að finna á vefnum töluvert af atvinnutilboðum sem berast frá Evrópu til Íslands í hverri viku. Þar má finna marga spennandi kosti, hvort sem horft er til skemmri eða lengri dvalar á erlendri grund.

Vefurinn er hannaður af Arngrími Arnarsyni og byggður á Outcome vefstjóranum, en fyrri vefur Eures, evrópskrar vinnumiðlunar var einnig byggður á því kerfi.  Rekstur vefsins er í höndum starfsfólks Eures á Íslandi.

www.eures.is